Sulmohet ekipi i një mediumi kosovar në Zveçan, lëndohen gazetari dhe kameramani

14:45 | 13 Qershor 2023
E.H

Asociacioni i Gazetarëve të Kosovës (AGK) ka njoftuar se në Zveçan është sulmuar me gurë ekipi i ATV-së, i përbërë nga gazetari, kameramani dhe shoferi, përderisa po përcillnin zhvillimet e fundit në këtë komunë.

Sipas mediumit, disa persona të maskuar, e kanë sulmuar me gurë veturën derisa ishte në lëvizje, e që si pasojë lëndime të lehta trupore kanë marrë gazetari Fatlum Jashari dhe kameramani Blend Thaçi, si dhe iu janë thyer xhamat veturës, përcjell Arbresh.info.

Asociacioni i Gazetarëve të Kosovës (AGK) ka shprehur shqetësime në lidhje me mungesës së sigurisë për gazetarët në veri të vendit.

“AGK vazhdon të jetë i shqetësuar për ekipet e medieve që po raportojnë nga veriu i vendit, andaj ju bëjmë thirrje Policisë së Kosovës, dhe prezencës ndërkombëtare atje të krijojnë kushte më të mira për ta”, thuhet në njoftim.